অ’সৰু ভনীটি

অ’ সৰু ভনীটি মুগা ৰিহা  পিন্ধিলি

লাহতী খোপাতে কপৌ ফুল গুজিলি

দেখি মৰম লাগি যায়

হায়, দেখি মৰম লাগি যায় ।

মনৰে চাপৰিত কঁহুৱা ফুলিছে

বৰ পথাৰত ঐ পেঁপাটি বাজিছে ।

লিহিৰী গগনাই

তোকে ঐ ৰিঙিয়াই ।

চেনাই ধন চেনাই ধন

তোৰে মান শুৱনি নাই...

অ’ সৰু ভনীটি মুগা ৰিহা ..।

দূৰৈৰ পথাৰতে অ’ কোনে

সিঙা পেঁপা বজালে ।

কোনেনো বিহুৱাই অ’ চেনাই

ৰিঙা ৰিঙা কৰিলে

গড়গঞা নাচনীৰ মন ।

পাখি লগা গাভৰুৰ মন ।

মৰমৰ দিখৌ নৌ সাঁতুৰি আহিলোঁ

চেনেহৰে ভোগদৈত ডিঙৰা মেলিলোঁ ।

অ’ দিহিঙে-দিপাঙে লৱৰি ফুৰিলোঁ

অ’ দিহিঙে-দিপাঙে লৱৰি ফুৰিলোঁ 

চেনাই ধন চেনাই ধন

তথাপি নেপালোঁতোক...।

অ’ সৰু ভনীটি....

অ’ভনী অ’ ...অ’ভনী অ’...। 

ফুল ফুলক ৰ’দৰ দৰে

ফুল ফুলক ৰ’দৰে ফুল

হৃদয় সেউজী ধাৰাত

ফুল ফুলক সূৰ্যমুখি ফুল

প্ৰিয়তমা, তোমাৰ খোপাত

নাহৰ পাতত মেঘৰ ছাঁয়াই

নাচক আজি

মন আকাশত ডাৱৰৰে ফুল

ফুলক আজি

প্ৰজাপতি মেলা সপোন পাখি

মুগ্ধ হিয়াত ফুল ফুলক

সূৰ্যমুখী ফুল প্ৰিয়তমা তোমাৰ খোপাত ।

 

এৰি অহা বাট ঢাকি থ

এখিলা  শুকান সৰাপাত

সমুখত প্ৰণয়ৰ তীৰ্থ-পথ

পখিলা পাখি মেলি থাক

বাঁহীৰ সুৰত নিশাৰ তৰাই নাচক আজি

দুটি নয়নত মধু জোন জ্বলক আজি

সূৰ্যমুখী মেলা সপোন পাহি

মোৰেই হিয়াত

ফুল ফুলক সূৰ্যমুখী ফুল

প্ৰিয়তমা তোমাৰ খোপাত ।

Post ID : DABP003901